གདན་ས་ཁམས་པ་སྒར་འབྲུག་མཐོ་སློབ་དྷརྨ་ཀཱ་ར།
- ༄༅།བྱེས་ཀྱི་ཁམས་སྒར་འབྲུག་མཐོ་སློབ་དྷམ་ཀཱ་རའི་བྱུང་རབས།
- ༄༅།གཞིས་ཀྱི་ཁམས་སྒར་འབྲུག་བཤད་གྲྭའི་བྱུང་རབས།
བོད་དུ་དུས་འགྱུར་བྱུང་བར་བརྟེན། ཕྱི་ལོ་༡༩༥༨ ལོར་ ༸དཔལ་རྒྱལ་བ་མདོ་ཁམས་བརྒྱད་པ་རིན་པོ་མཆོག་རྒྱ་གར་དུ་བྲོས་བྱོལ་ཕེབས་དགོས་བྱུང་། འཕགས་ཡུལ་དུ་ཞབས་སོར་འཁོད་གྲུབ་མཚམས་སུ་རིས་མེད་ནང་བསྟན་གླིང་སྦག་སའི་ཆོས་སྒར་ཆེན་མོ་གསར་འཛུགས་མཛད། ཕྱིས་སུ་ཀ་པུངས་དང་ཌལ་ཧའུ་སེ། བཀྲ་ཤིས་ལྗོངས་བཅས་སུ་གཞིས་ཆགས་རིང་རྙིང་མའི་མཁན་པོ་ཐུབ་བསྟན་དང་། བཀའ་བརྒྱུད་མཁན་པོ་ཆོས་དར། ས་སྐྱའི་མཁན་པོ་རིན་ཆེན། མཁན་པོ་མཁས་གྲུབ་སོགས་སྔ་ཕྱིར་གདན་ཞུས་ཀྱིས་མཆོག་སྤྲུལ་རྣམས་དང་གྲྭ་བློ་གསལ་བཟང་པོ་སོགས་དགེ་འདུན་པ་རྣམ་པར་སྐབས་དང་དུས་སུ་ནང་དོན་རིག་པའི་གཞུང་ལུགས་ཁག་གི་དཔེ་ཁྲིད་གནང་ནའང་། ༸དཔལ་རྒྱལ་བ་མདོ་ཁམས་བརྒྱད་པ་དགོངས་པ་ཆོས་དབྱིངས་སུ་ཐིམ་པ་དང་དཔེ་ཁྲིད་གནང་མཁན་ཇི་བཞིན་མ་རྙེད་པ་སོགས་ཀྱིས་བར་ལམ་ཞིག་ལ་བཤད་པའི་སྡེ་ཆུང་ངུ་དེ་ཡང་མཚམས་འཇོག་གནང་དགོས་པ་བྱུང་།
ལོ་ཤས་རྗེས་དེ་སྔོན་༸དཔལ་རྒྱལ་བ་མདོ་ཁམས་བརྒྱད་པ་རིན་པོ་ཆེ་མཆོག་ནས་གྲྭ་བློ་གསལ་བཟང་པོ་ལ་མ་འོངས་པར་རང་དགོན་དུ་སློབ་ཁྲིད་དང་སློབ་གཉེར་ཐོག་ཕྱག་ལས་གནང་དགོས་ཚུལ་བཀའ་ཕེབས་སྙིང་བཅངས་ཀྱིས་རྙིང་མའི་མཁན་པོ་ཟླ་ཟེར་དང་། ས་སྐྱའི་མཁན་པོ་རིན་ཆེན་སོགས་ཀྱི་མདུན་ནས་ལོ་མང་རིང་རྒྱུན་མཐུད་སློབ་གཉེར་གནང་ནས་བསླབ་པ་མཐར་སོན་བྱུང་བར་བརྟེན། སླར་༸སྐྱབས་རྗེ་རྡོ་རྫོང་རིན་པོ་ཆེ་མཆོག་གིས་བཀྲ་ཤིས་ལྗོངས་སུ་བློ་གསལ་བཟང་པོ་མཁན་ཁྲིར་མངའ་གསོལ་དང་། འབྲུག་པ་ཆོས་མགོན་རིན་པོ་ཆེ་དང་གྲུབ་དབང་ཚོགས་གཉིས་རིན་པོ་ཆེ་གཙོས་རང་དགོན་དང་འབྲུག་ཡུལ་ནས་ཕེབས་པའི་སློབ་གཉེར་བ་གྲངས་བཞི་བཅུ་ཡས་མས་ལ་སྔར་ཕྱི་ལོ་མང་རིང་དཔེ་ཁྲིད་རྒྱུན་མཐུད་གནང་མཛད། སློབ་གཉེར་བ་དེ་དག་ལ་བཞུགས་གནས་དང་འཚོ་བ་སོགས་དགོན་པ་གཞུང་གྲྭ་ཚང་ནས་ནར་གཏོང་མཛད།
དེའི་རྗེས་འཇམ་དབྱངས་མཁྱེན་བརྩེ་ཡེ་ཤེས་རིན་པོ་ཆེ་མཆོག་ནས་༸དཔལ་རྒྱལ་བ་མདོ་ཁམས་བརྒྱད་པ་བསྐལ་བཟང་དོན་བརྒྱུད་ཉི་མ་མཆོག་གིས་ཆོས་དང་འཇིག་རྟེན་གཉིས་ཀའི་ཐོག་བཀའ་དྲིན་ཆེན་པོ་གནང་ཡོད་པ་མ་ཟད་བཤད་གྲྭ་ལའང་ཐུགས་རེ་ཆེན་པོ་གནང་ཡོད་པ་སོགས་ལ་བརྟེན། དེའི་སྐུ་དྲིན་གྱི་ཆ་ཤས་མཚོན་ཕྱིར་བཀྲ་ཤིས་ལྗོངས་སུ་བཤད་གྲྭའི་གཙུག་ལག་ཁང་དང་གྲྭ་ཤག་སོགས་རྟེན་དང་བརྟེན་པར་བཅས་པ་གསར་སྐྲུན་མཛད་ཅིང་། བཤད་གྲྭའི་འཛིན་སྐྱོང་ལོགས་སུ་ཡོང་ཆེད་གསོལ་དོད་ཡང་གང་འཚམས་གནང་བ་བཅས་ལ་བརྟེན།
ཕྱི་ལོ་༢༠༠༣ ལོར་༸དཔལ་རྒྱལ་བ་མདོ་ཁམས་པ་སྐུ་ཕྲེང་དགུ་པ་བཤད་སྒྲུབ་ཉི་མ་མཆོག་དབུ་བཞུགས་ཀྱིས་བཤད་གྲྭ་གསར་པ་དབུ་འགྱེད་མཛད་སྒོ་གནང་ཞིང་། ཁམས་པ་སྒར་གྲྭ་ཚང་ནས་བཤད་གྲྭའི་གཉེར་པ་བསྐོ་གཞག་བྱས། ཕྱི་ལོ་༢༠༠༥ ལོར ་༸རྒྱལ་བ་མདོ་ཁམས་པ་མཆོག་དང་སྐྱབས་རྗེ་རྡོ་རྫོང་རིན་པོ་ཆེ་རྣམ་གཉིས་དབུས་རང་དགོན་གྱི་བླ་སྤྲུལ་རྣམ་པའི་ལམ་སྟོན་འོག་ཁམས་གྲྭ་ཆོས་དབྱིངས་ལྷུན་འགྲུབ་དང། བྱམས་པ་ཡོན་ཏན། ངག་དབང་བཟང་པོ་སོགས་བཤད་གྲྭར་ཕེབས་ཏེ། མཁན་པོ་བློ་གསལ་མཆོག་དང་། སྤྲུལ་སྐུ་སྤོབས་པ་རྣམ་གཉིས་དང་ལྷན་དུ་དཔེ་ཁྲིད་དང་། སྒྲིག་གཞི །སློབ་ཚན། འཛིན་གྲྭའི་གོ་རིམ་སོགས་དབུ་བརྩམས་ཤིང་ཁམས་གྲྭ་ཆོས་དབྱིངས་ལྷུན་འགྲུབ་མཆོག་ནས་རིས་མེད་ཀྱི་སློབ་གླིང་ཁག་ཏུ་སློབ་སྦྱོང་ཡུན་རིང་གནང་སྟབས་༸རྒྱལ་བ་མདོ་ཁམས་དགུ་པ་ངེས་ དོན་བཤད་སྒྲུབ་ཉི་མ་མཆོག་གིས་མཁན་ཁྲིར་མངའ་གསོལ་གནང་།
ཕྱི་ལོ་ ༢༠༠༦ ལོར་དཔལ་རྒྱལ་བ་མདོ་ཁམས་པ་མཆོག་དང་སྐྱབས་རྗེ་རྡོ་རྫོང་རིན་པོ་ཆེ་རྣམ་གཉིས་གཙོས་རང་དགོན་གྱི་བླ་སྤྲུལ་དག་ལ་ལམ་སྟོན་ཞུས་ཏེ་བཤད་གྲྭའི་ཡིག་ཚང་གསར་འཛུགས་ཀྱིས་མཁན་པོ་བློ་གསལ་བཟང་པོ་མཆོག་གིས་རྒྱུན་ལྡན་འགྲོ་སོང་ཆེད་དཔལ་འབྱོར་འདུ་འགོད་གནང་བ་དང། མཁན་པོ་ཆོས་དབྱིངས་ལྷུན་འགྲུབ་མཆོག་དང་རྒན་བྱམས་པ་ཡོན་ཏན། རྒན་ངག་དབང་བཟང་པོ་སོགས་ཀྱིས་དཔེ་ཁྲིད་དང་སྒྲིག་གཞི ཡིག་ཚང་གི་རྒྱུན་ལས་སོགས་ཀྱི་འགན་ཁུར་གནང་།
ཕྱི་ལོ་༢༠༠༨ ལོར་མཁན་ལས་རྣམས་ཀྱིས་བཤད་གྲྭའི་གཞི་རིམ་སློབ་གྲྭའི་སློབ་ཕྲུག་ལྔ་བཅུ་ཡས་མས་གསར་བསྡུ་དང་འབྲེལ་སློབ་ཕྲུག་རྣམས་ལ་སློབ་སྦྱོང་སོགས་ཀྱི་མཐུན་རྐྱེན་བསྐྲུན་ཞིང་། ལོ་འདི་ནས་བཙུན་དགོན་དོན་བརྒྱུད་དགའ་ཚལ་གླིང་དུ་བཤད་གྲྭ་ནས་མཁན་པོ་མངག་གཏོང་བྱེད་རྒྱུ་མགོ་བརྩམས། བཤད་གྲྭར་ལོ་རེ་བཞིན་སློབ་གཉེར་བའི་གྲངས་ཀ་མང་དུ་འགྲོ་བཞིན་པ་སོགས་ལ་བརྟེན་ནས་འདུ་ཁང་དང་། གྲྭ་ཤག འཛིན་ཁང་སོགས་ཀྱི་དཀའ་ངལ་ཡོད་པ་ཙམ་དུ་མ་ཟད་དོན་བརྒྱུད་དཔལ་ལྡན་འབྲུག་པ་བཀའ་བརྒྱུད་ཀྱི་བསྟན་པ་མི་ཉམས་གོང་འཕེལ་ཆེད་སློབ་གླིང་གསར་སྐྲུན་དགོས་པ་གལ་ཆེན་མཐོང་ནས། ༸དཔལ་རྒྱལ་བ་མདོ་ཁམས་པ་མཆོག་གིས་དབུས་རང་དགོན་གྱི་མཆོག་སྤྲུལ་རིན་པོ་ཆེ་རྣམས་ལ་བཀའ་སློབ་ལམ་སྟོན་ཞུས་ནས་སློབ་གླིང་གསར་སྐྲུན་དང་འབྲེལ་བའི་ཚོགས་པ་ཞིག་འཛུགས་ཐབས་བྱས།
ཕྱི་ལོ་༢༠༠༩ ལོར་༸དཔལ་རྒྱལ་བ་མདོ་ཁམས་པ་མཆོག་དང་སྐྱབས་རྗེ་རྡོ་རྫོང་རིན་པོ་ཆེ། རྟོགས་རྒན་ཨ་ཆོས་རྣམ་པར་ལམ་སྟོན་ཞུས་ཏེ་བཤད་གྲྭའི་གྲྭ་ལྷུན་གྲུབ་དཔལ་ལྡན་གཉེར་པར་བསྐོ་གཞག་བྱས་ཤིང་། སྤྲུལ་སྐུ་སྤོབས་པ་འདི་ག་གཞིས་ལས་ཁང་གི་དབུ་འཛིན་གཞོན་པ་ཡིན་པའི་སྐབས་སུ་ས་གནས་ཀྱི་ཡུལ་མིའི་ཉིན་མོའི་སློབ་ཁང་ཞིག་གསར་བཞེང་གནང་བ་དེ་ཉིད་བཤད་གྲྭའི་གཞི་རིམ་སློབ་ཕྲུག་ཆེད་གནང་ཐུབ་ན་དགེ་མཚན་ཆེ་སྐོར་ཞུས་པ་ལྟར་ཞལ་བཞེས་ཐོབ། སློབ་ཕྲུག་རྣམ་པ་དེར་གནས་སྤོས་བྱས། གྲྭ་ཚང་གི་ཞིང་ཁ་དེར་བཤད་གྲྭ་གསར་བཞེང་གནང་གཏན་ཁེལ་བ་དང། རྒན་བྱམས་པ་ཡོན་ཏན་དང། རྒན་ངག་དབང་བཟང་པོ་རྣམ་གཉིས་རིས་མེད་སློབ་གླིང་མང་པོར་སློབ་སྦྱོང་ལོ་མང་རིང་གནང་སྟབས། ༸རྒྱལ་བ་མདོ་ཁམས་དགུ་པ་ངེས་དོན་བཤད་སྒྲུབ་ཉི་མ་མཆོག་གིས་མཁན་པོའི་མཚན་གནས་བསྩལ་གནང་།
ཕྱི་ལོ་༢༠༡༠ ལོར་༸དཔལ་རྒྱལ་བ་མདོ་ཁམས་དགུ་པ་རིན་པོ་ཆེ་མཆོག་གི་མཚན་ཐོག་ནས་མཐོ་སློབ་འདི་ཉིད་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་བྱས་ཏེ་སློབ་གླིང་གསར་བཞེང་དང་འབྲེལ་བའི་ལས་གཞི་ཁག་གཉེར་བ་དང་། ལོ་དེར་སྐྱོར་དཔོན་ཚུལ་ཁྲིམས་རྣམ་རྒྱལ་མཁན་ཁྲིར་མངའ་གསོལ་བྱས།
ཕྱི་ལོ་༢༠༡༡ ཕྱི་ཟླ་༡༡པའི་ཚེས་༣༠ ཉིན་སློབ་གླིང་གསར་པའི་ས་འདུལ་བྱིན་རླབས་སོགས་ཀྱི་མཛད་སྒོ་དེ་རྒྱལ་བ་མདོ་ཁམས་པ་དང་སྐྱབས་རྗེ་རྡོ་རྡོང་རིན་པོ་ཆེ། གྲུ་གུ་ཆོས་རྒྱལ་རིན་པོ་བཅས་དབུ་བཞུགས་ཐོག་གནང་། ཕྱི་ལོ་༢༠༡༡ ཡས་མས་སུ་མཁན་པོ་བློ་གསལ་བཟང་པོ་ནས་༸ རྒྱལ་བ་མདོ་ཁམས་པ་མཆོག་ལ་ལམ་སྟོན་ཞུས་ཏེ་མ་ལེ་ཤི་ཡར་ཆོས་ཚོགས་ཤིག་གསར་འཛུགས་གནང་། ཕྱི་ལོ་༢༠༡༣ ཡས་མས་སུ་མཁན་པོ་ངག་དབང་བཟང་པོ་མཆོག་ནས་ཐའེ་ཝན་དུ་བཤད་གྲྭའི་ཆོས་ཚོགས་ཤིག་གསར་དུ་བཙུགས།
ཕྱི་ལོ ༢༠༡༥ ལོར་སློབ་དཔོན་བསྟན་འཛིན་སྟོབས་རྒྱལ་དང་བཀྲ་ཤིས་རྒྱལ་མཚན་རྣམ་གཉིས་མཁན་ཁྲིར་མངའ་གསོལ་བྱས་པ་དང་། ༢༠༡༦ ལོར་སློབ་དཔོན་དཔོན་བསོད་ནམས་དབང་རྒྱལ་དང་། བསྟན་འཛིན་བྱམས་པ། བློ་གྲོས་རྒྱ་མཚོ། ཚེ་དབང་བདེ་ཆེན། བསོད་ནམས་གྲགས་པ་བཅས་མཁན་ཁྲིར་གསོལ། ལོ་དེར་སློབ་གླིང་གསར་པའི་ཨར་ལས་དངོས་སུ་དབུ་འཛུགས་བྱས།
ཕྱི་ལོ་༢༠༡༧ ལོར་ཁམས་གྲྭ་ཐུབ་བསྟན་དགེ་ལེགས་དང་ངག་དབང་ཆོས་བཟང་རྣམ་གཉིས་འཕགས་ཡུལ་སེར་བྱེས་ནས་དཔེ་ཁྲིད་ཆེད་དུ་རང་དགོན་གྱི་བཤད་གྲྭར་ཕེབས། མདོར་ན། ༢༠༠༩ ལོ་ནས་ལོ་རེར་བསླབ་པ་མཐར་སོན་ཇེ་མང་དང་། སློབ་དཔོན་དང་སྐྱོར་དཔོན་བཅུ་ཕྲག་མང་པོ་བསྐོ་འཇོག་ཐུབ་པ་བྱུང་ཡོད། ད་ལྟའི་ཆར་བོད་ཚེས་བཅུ་དགོན་དང་། གླིང་བསྟན་འཕེལ་དགོན་སོ་སོར། མཁན་པོ་ཚུལ་ཁྲིམས་རྣམ་རྒྱལ་དང་། མཁན་པོ་བཀྲ་ཤིས་རྒྱལ་མཚན་གཉིས་ནས་བསྟན་པའི་གསོས་སུ་སྨིན་པའི་མཁན་པོའི་ཕྱག་ལས་གནང་གི་ཡོད་ཅིང་། མཁན་པོ་བསོད་ནམས་གྲགས་པ་དང་། སློབ་དཔོན་འཇིགས་མེད་ཚེ་རིང་གཉིས་ནས་ཕུན་ཚོགས་གླིང་བཤད་གྲྭ་དཔལ་ལྡན་བཀྲ་ཤིས་ཆོས་གླིང་དུ་དཔེ་ཁྲིད་གནང་གི་ཡོད་པ་དང་། སློབ་དཔོན་སྐལ་བཟང་ཟླ་བས་མཁོ་ཐང་རིན་ཆེན་གླིང་བཤད་གྲྭར་སློབ་ཁྲིད་གནང་གི་ཡོད། སློབ་དཔོན་བསོད་ནམས་སྟོབས་རྒྱལ་ཐིམ་ཕུག་བཀྲ་ཤིས་ཆོས་རྫོང་དུ་སློབ་ཁྲིད་གནང་གི་ཡོད་ཅིང་། སློབ་དཔོན་ཚེ་རིང་དཔལ་འབྱོར་མདོ་སྡེ་བྲག་བཤད་གྲྭར་དཔེ་ཁྲིད་བྱེད་བཞིན་ཡོད་པ་དང་། དེ་བཞིན་དུ་འབྲུག་བྱང་ཆུབ་ལྗོངས་དང་། ཟངས་དཀར་དགོན་ཁག་གསུམ། བཙུན་དགོན་དོན་བརྒྱུད་དགའ་ཚལ་གླིང་། གློ་ཚོགས་གཉིས་བཙུན་དགོན། ལྷོ་འབྲུག་རྒྱལ་མཚན་སྤྲུལ་སྐུའི་སྔགས་གྲྭ་རྡོ་རྗེ་ཆོས་སྒར་བཅས་སུ་མཁན་པོ་གཏོང་གི་ཡོད།
གཞན་ཡང་སློབ་གླིང་འདིར་འཕགས་ཡུལ་རྫོང་སར་བཤད་གྲྭ་དང་སེར་བྱེས་གྲྭ་ཚང་སོགས་ནས་མཁན་པོ་དང་དགེ་བཤེས་གང་མང་གདན་ཞུ་བྱས། དེང་གི་ཆར་མཁན་པོ་བློ་གསལ་བཟང་པོ་དང་། མཁན་པོ་ཆོས་དབྱིངས་ལྷུན་འགྲུབ། མཁན་པོ་བྱམས་པ་ཡོན་ཏན། མཁན་པོ་ངག་དབང་བཟང་པོ། སྤྲུལ་སྐུ་སྤོབས་པ་རྣམ་པས་གཙོས་མཁན་སློབ་དགེ་ལས་རྣམས་ཀྱིས་རྒྱལ་བ་མདོ་ཁམས་པ་མཆོག་དང་སྐྱབས་རྗེ་རྡོ་རྫོང་རིན་པོ་ཆེ། རྟོགས་རྒན་ཨ་ཆོས་བཅས་ཀྱི་ལམ་སྟོན་འོག ཤེས་ཡོན་དང་། སྒྲིག་གཞི། དཔལ་འབྱོར།འཛུགས་སྐྲུན། སློབ་གཉེར་བའི་གྲངས་ཀ་སོགས་ལ་སྒོ་ཀུན་ནས་འབད་བརྩོན་དང་། རྒྱལ་བ་མདོ་ཁམས་པ་སྐུ་གོང་མ་དག་གི་ཐུགས་བསྐྱེད་སྨོན་ལམ་གྱི་མཐུ་ལས་དེང་སང་མཁན་སློབ་གྲངས་ཉིས་བརྒྱ་ལྷག་གིས་བསླབ་པ་སློབ་གཉེར་གནང་བཞིན་པ་བཅས་ལོ་རྒྱུས་མདོར་བསྡུས་སུ་བཀོད་པའོ། །
རྒྱལ་བས་ལུང་དུ་བསྟན་པའི་སྐྱེས་བུ་ཆེན་པོ། འཕགས་པ་སྤྱན་རས་གཟིགས་ཀྱི་སྒྱུ་འཕྲུལ་རྒྱ་གར་འཕགས་པའི་ཡུལ་དུ་པཎ་ཆེན་ནྭ་རོ་པ་དང་། ཁ་བ་ཅན་དུ་འགྲོ་བའི་མགོན་པོ་གཙང་པ་རྒྱ་རས་ཡེ་ཤེས་རྡོ་རྗེ་ཞེས་ཡོངས་སུ་གྲགས་པ་དེས། བསིལ་ལྡན་གངས་རིའི་མུ་ཁྱུད་ཀྱིས་མཛེས་པར་བསྐོར་བའི་བོད་ཀྱི་ལྗོངས་སུ། དྭགས་བརྒྱུད་སྙིང་པོ་དོན་བརྒྱུད་དཔའ་ལྡན་དབྱར་རྔ་པའི་བསྟན་པའི་ཉི་གཞོན་གསར་དུ་འདྲེན་པར་མཛད་པ་ནས་བཟུང་། སློབ་མ་ཡང་སློབ་རྣམས་ཀྱིས་ངེས་དོན་ཕྱག་རྒྱ་ཆེན་པོ་དང་། ཟབ་ལམ་ནྭ་རོ་ཆོས་དྲུག གདམས་ངག་རོ་སྙོམས་སྐོར་དྲུག་སོགས་ཀྱིས་སྙིང་པོའི་ལམ་ལ་ཉམས་བཞེས་རྩེ་གཅིག་ཏུ་གཞོལ་བར་མཛད་དེ། ལོ་རྒོད་གཉིས་དང་། པ་རྐྱང་གཉིས་སོགས་ལས་སྟོད་འབྲུག བར་འབྲུག སྨད་འབྲུག་གི་བརྒྱུད་པ་བྱུང་བ་དང་། དབོན་རས་དར་མ་སེངྒེ་ནས་བརྩམས་དཔོན་བརྒྱུད་སེངྒེ་དགུ་ཚར་དང་། རིགས་གསུམ་རྣམ་སྤྲུལ་སོགས་ལས་གདན་ས་བརྒྱུད་པ་བྱུང་བ་བཅས་ཀྱིས་དོན་བརྒྱུད་ཀྱི་ཕྲིན་ལས་ཁྱབ་གདལ་དུ་བྱུང་བས། རྡོ་རྗེ་ཕགས་མོས་ལུང་བསྟན་གནང་བ་ལྟར་དཔལ་ལྡན་འབྲུག་པའི་བསྟན་པས་བྱ་རྒོད་པོའི་ཉིན་ལམ་བཅོ་བརྒྱད་དུ་ཁྱབ་པ་དེ་བྱུང་། དེ་ནས་དུས་རབས་བཅུ་དྲུག་པའི་འགོ་སྟོད་ལ་རྒྱ་རས་ཀྱི་རྣམ་སྤྲུལ་བཞི་པ་པད་མ་དཀར་པོ་ཞེས་ཤེས་བྱ་རིག་པའི་གནས་མཐའ་དག་ལ་སྤོབས་པའི་གཟེངས་མཐོ་བ། ཐམ་ཅད་མཁྱེན་པའི་མཚན་གྱི་གྲགས་དཀར་ཕྱོགས་ཐམས་ཅད་དུ་ཁྱབ་པ་དུས་ལ་བབས་ཤིང་དོན་དུ་འགྱུར་བ་གཟིགས་ནས། སྔོན་གྱི་སྒྲུབ་བརྒྱུད་གོང་མ་རྣམས་ཀྱིས་བསྒྲུབ་པ་ཉམས་བཞེས་ཀྱི་ཕྱག་བཞེས་གཙང་ལ་མ་ཉམས་པའི་ཁར། ལུང་གི་བསྟན་པ་རིན་པོ་ཆེ་ཡང་ཆེས་ཆེར་སྤེལ་བར་མཛད་པ་དང་ཆབས་ཅིག་འཆད་སྤེལ་གནང་བས་བཤད་རྒྱུན་འདེགས་པའི་ཀ་ཆེན། མཁས་དབང་སངས་རྒྱས་རྡོ་རྗེ། བོད་མཁས་པ་དགེ་ལེགས་རྣམ་རྒྱལ། དུས་ཞབས་པ་དཔལ་རྒྱལ་བའི་དབང་པོ་སོགས་སློབ་མ་དང་ཡང་སློབ་དུ་མ་བྱོན་པ་དང་དེ་བཞིན་དུ་བཤད་རྒྱུན་འཁྲུལ་མེད་འཛིན་པའི་ཆོས་གྲྭ་པད་དཀར་གྲྭ་ཚང་དུ་གྲགས་པའི་མཚན་ཉིད་ཀྱི་བཤད་གྲྭ་བཙུགས་པར་མཛད་པ་ནི་དཔལ་ལྡན་འབྲུག་པ་དཀར་བརྒྱུད་ཀྱི་བཤད་པའི་གྲྭ་ཐོག་མ་ཡིན། དེ་འབྲེལ་ཁམས་སྤྲུལ་སྐུ་ཕྲེང་བཞི་པ་བསྟན་འཛིན་ཆོས་ཀྱི་ཉི་མས་བསྟན་པའི་གསོལ་སྨན་དུ། བྱིང་ཕུ་དཔལ་གྱི་ཡང་དབེན་དུ་མཚན་ཉིད་བཤད་གྲྭ་རྣམ་རྒྱལ་ཆོས་འཁོར་གླིང་རྟེན་བརྟེན་པར་བཅས་པ་གསར་བཞེང་གིས། དེར་དགེ་འདུན་པ་བརྒྱ་དང་བརྒྱད་ཀྱིས་མདོ་ཕྱོགས་གཞུང་ལུགས་རྒྱ་མཚོར་འཆད་ཉན་རྒྱུན་མཐུད་མཛད་པས། མཁས་མཆོག་རབ་འབྱམས་པ་དང་། བཀའ་བཅུ་པའི་མཚན་རྟགས་ཀྱིས་སྒེག་པའི་མཁས་བཙུན་གྱི་ཡོན་ཏན་ཅན་མང་དུ་བྱུང་བ་དེ་དག་གིས་འཆད་རྩོད་ཕྲིན་ལས་ཀྱི་སྣང་བས་བསྟན་འགྲོའི་རྒུད་མུན་བསལ་ཏེ་ཕན་བདེའི་པདྨོ་ཆེས་ཆེར་རྒྱས་པར་མཛད། དེ་བཞིན་དུ་ཁམས་སྤྲུལ་སྐུ་ཕྲེང་བདུན་པ་སངས་རྒྱས་བསྟན་འཛིན་ནས་ཁམས་པ་སྒར་རང་དུ་མཚན་ཉིད་ཐོག་བཤད་གྲྭ་ཚད་ལྡན་འཛུགས་བཞེས་ཀྱིས། ཀ་ཐོག་སི་ཏུ་མ་ཧྭ་པཎྜིཏ་ཆོས་ཀྱི་རྒྱལ་མཚོ་ཆེན་པོར་དེ་སྐོར་སྙན་གསན་ཕུལ་བར་ཐུགས་དགྱེས་ཚོར་ཆེན་པོས་མཁན་པོ་ཚེ་རྡོར་ཁམས་སྒར་དུ་ཆེད་མངག་གནང་མཛད་ཡོད་རུང་སངས་རྒྱས་བསྟན་འཛིན་སྐུ་ཚེ་མཐར་མ་ཕྱིན་པས་བཞེས་པ་འཕྲོས་ལུས་གྱུར་པ། སླར་ཁམས་སྤྲུལ་སྐུ་ཕྲེང་བརྒྱད་པ་བསྐལ་བཟང་དོན་བརྒྱུད་ཉི་མ་མཆོག་ནས་ཁམས་སྒར་དཔལ་ཕུན་ཚོགས་ཆོས་འཁོར་གླིང་རང་དུ་བཤད་གྲྭའི་གཙུག་ལག་ཁང་བར་རྩེགས་གཉིས་ཅན་ལ་ཤག་མིག་བརྒྱད་བཅུས་བསྐོར་བའི་བཤད་གྲྭ་རྟེན་བརྟེན་པ། དེ་འབྲེལ་གསོལ་ཐབ་ཁང་བཅས་གསར་བཞེངས་དང་འབྲེལ། ཁམས་བྱེ་དང་ཀ་ཐོག་གཉིས་ནས་མཁན་ལེགས་བཤད་དང་མཁན་དགེ་འདུན་དར་རྒྱས་གཉིས་གདན་ཞུས་ཀྱིས་དུས་འགྱུར་མ་བྱུང་བར་གཞུང་ཆེན་བཀའ་པོད་ལྔ་སོགས་ཀྱི་གཞུང་ལུགས་དུ་མར་འཆད་རྩོད་རྩོམ་གསུམ་གྱིས་གཏན་ལ་ཕབ་ནས་ལུང་གི་བསྟན་པ་ཆེས་ཆེར་རྒྱས་པ་མཛད།
དུས་འགྱུར་རྗེས་སུ་༸རྒྱལ་བ་མདོ་ཁམས་བརྒྱད་པའི་སྐུ་མཆེད་སྤྲུལ་སྐུ་སྙན་གྲགས་རྒྱ་མཚོ་རིན་པོ་ཆེ་མཆོག་གིས་ཤད་གྲྭའིགཙུག་ལག་ཁང་དང་གྲྭ་ཤག་ཁང་མིག་དྲུག་ཅུ་ཙམ་ཡོད་པ་ཞིག་གསར་བཞེངས་གནང་ཞིང་། འབྲོང་སྤྲུལ་རིན་པོ་ཆེ་མཆོག་གིས་ཀྱང་བཤད་གྲྭའི་སློབ་གཉེར་བའི་འཚོ་དོད་གནང་།
སྤྱི་ལོ་ ༡༩༩༥ ལོར་རྫ་པད་སྙིང་དགོན་པའི་མཁན་པོ་ལྷ་དབང་རྡོ་རྗེ་གདན་ཞུས་གནང་བ་དང་། དེའི་རྗེས་དགོན་ཕུ་དགོན་པའི་མཁན་པོ་ཀརྨ་ཚེ་དབང་སྔ་ཕྱིར་དང་གོ་འཇོ་གསེར་ཁ་མཁན་པོ་པདྨ་བསྟན་འཛིན། བྲག་མགོ་སྒོ་ཆེན་དགོན་པའི་མཁན་པོ་ཟླ་དབང་བཅས་གདན་ཞུས་བྱས་ཏེ། ཁོང་རྣམ་པས་རིམ་པས་གཞུང་ཆེན་སོགས་ལ་སློབ་ཁྲིད་ལོ་ཤས་རིང་གནང་ཡོད་ནའང་། མཆོག་སྤྲུལ་སྙན་གྲགས་རྒྱ་མཚོ་རིན་པོ་ཆེ་ཞིང་ལ་ཕེབས་པ་དང་། ༸སྐྱབས་རྗེ་སྒྲུབ་དགའ་རིན་པོ་ཆེ་མཆོག་སྐུ་ཚད་མ་སྨིན་པ་སོགས་ཀྱིས་རྒྱུན་མཐུད་མ་ཐུབ་སྟབས། སློབ་གཉེར་བ་བློ་ཁ་མཐོ་གྲལ་རྣམས་སློབ་གཉེར་ཆེད་དུ་གསེར་ཐང་བླ་རུང་སྒར་དང་། རྫ་སེར་ཤུལ་དགོན། རྫ་ཨ་རིག་སྒར། སྡིང་པོ་ཆེ་ལ་སོགས་པའི་ཕྱོགས་སོ་སོར་སློབ་གཉེར་ཆེད་དུ་ཕེབས་གནང་།
ཕྱི་ལོ་༢༠༠༧ ལོར་སྐྱབས་རྗེ་སྒྲུབ་དགའ་རིན་པོ་ཆེ་ཉིད་ཀྱིས་བཤད་གྲྭ་བ་རྣམས་གཙོས་པའི་ཡུལ་དེའི་གྲྭ་བཙུན་རྣམས་ལ་དྭགས་པོ་ཐར་རྒྱན་བཀའ་ཁྲིད་གནང་བ་དང་། སྔོན་ཆད་གསེར་ཐང་བླ་རུང་སོགས་ཕྱོགས་སོ་སོར་སློབ་གཉེར་ཆེད་དུ་སོང་བའི་སློབ་གཉེར་བ་རེ་ཟུང་རྒྱ་གར་ལ་ཕེབས་ཚར་ཡང་། གསེར་ཐང་བླ་རུང་སོགས་ལ་བཞུགས་པའི་རང་དགོན་གྱི་སློབ་གཉེར་བ་ཁག་ཅིག་སླར་ཡང་བསྡུས་ཏེ། འཚོ་བའི་ཆ་རྐྱེན་སོགས་ཕྱོགས་གང་ཐད་ནས་ཕུན་སུམ་ཇེ་ཚོགས་སུ་བཏང་སྟེ། སྔར་གྱི་སློབ་གཉེར་བ་རྒན་གྲས་གསེར་ཐང་བླ་རུང་དང་། རྫ་སེར་ཤུལ། རྫ་ཨ་རིག་སྒར། སྡིང་པོ་ཆེ་སོགས་རིས་མེད་ཁག་ཏུ་སློབ་གཉེར་གནང་མྱོང་ཡོད་པའི། གྲྭ་ཚེ་དབང་འགྱུར་མེད་དང་། ངག་དབང་རྣམ་རྒྱལ། ཀརྨ་མི་འགྱུར། དམ་ཆོས་ཡོངས་འདུལ། བསོད་ནམས་དཔལ་བཟང་བཅས་མཁན་ཁྲིར་མངའ་གསོལ་དང་། བཤད་གྲྭ་རྙིང་པ་རྒྱ་བསྐྱེད་གནང་སྟེ་གཙུག་ལག་ཁང་ཐོག་རྩེགས་བཞི་ཅན་ཞིག་དང་གྲྭ་ཤག་གཅིག་བརྒྱ་བརྒྱད་ཙམ་ཞིག་གསར་བཞེང་གནང་ཡོད་ཅིང་། མཁན་པོ་ཁོང་རྣམ་པས་ད་བར་མི་ལོ་བཅུ་ལྷག་ཙམ་གྱི་རིང་སློབ་ཁྲིད་ཚད་ལྡན་གནང་བ་སོགས་ལ་བརྟེན་ནས། ད་སྐབས་བཤད་གྲྭ་བ་རྣམས་སློབ་གཉེར་གནང་ཕྱོགས་སྤུས་ཚད་ཇེ་མཐོར་ཕྱིན་པ་དང་། སློབ་གཉེར་བའི་གྲངས་ཚད་ཇེ་མང་སོང་ཡོད། ད་སྐབས་བཤད་གྲྭའི་སློབ་གཉེར་བའི་གྲངས་བརྒྱ་དང་ལྔ་བཅུ་ཙམ་ཡོད་པར་མ་ཟད་དེའི་ཁྲོད་སྐྱོར་ཁྲིད་གནང་ཐུབ་པའི་སྐྱོར་དཔོན་གྲྭ་པ་ལྔ་ཙམ་ཡོད། གཞི་རིམ་སློབ་ཕྲུག་ལྔ་བཅུ་ཡས་མས་ལ་མཁན་པོ་བསོད་ནམས་དཔལ་བཟང་ནས་བརྡ་སྤྲོད་དང་ཡིག་གཟུགས་སོགས་སློབ་ཁྲིད་ལོ་མང་རིང་གནང་དང་གནང་མུས་ཡིན།
